Aberri Egun honetan berriz ere konfiantza dugu gure nazioaren gaitasunean, behin eta berriz erakutsi baitu horri eusteko gaitasuna. Alde horretatik, Euskal Errepublika eraiki dezakegun modua da pertsonak gure ekintza politikoaren erdigunean jartzea, funtzionatu ez duena berrikustea eta aldaketarako konpromisoa hartzea, funtzionatzeko dugun modua behar berrietara egokituz.
Ezinbestekoa da gogoratzea oso une zaila igarotzen ari garela, non pertsona eta erakunde guztiok ahaleginak batu behar ditugun COVID-19ren hedapena geldiarazten saiatzeko eta, ahal den neurrian, gure hirian izaten ari den ondorio sozial eta ekonomiko tragikoak arintzeko. Gainera, etorkizunari begira behar adina tresna jarri beharko ditugu.
Espainiako armadara bideratzen diren baliabideak ikusten ditugunean eta hauek gure hiriko geltokia desinfektatzen dutenean, eta pandemiari buruz egiten den gehiegizko militarizazioa ikusita, gizarteari bidaltzen zaion mezua argia da, eta ezin da beste bat izan, erakunde prestatuak nahi ditugula, osasungintzan eta ikerketan inbertitzen dutenak, osasun-langileek beharrezko baliabideak eta babes-ekipamenduak izan ditzatela. Ejertzitora eta monarkia zaharkitura bideratzen den inbertsioa, pandemiari egunez egun aurre egiten dioten pertsonei falta zaien inbertsioa da.
Bikaina da laguntza- eta desinfekzio-lana, babes zibileko profesionalen sareak egiten duena, bai eta une honetan egoera txarrenean dauden kolektiboei laguntzen ari diren boluntarioena ere, osasun-zentroetan, harrera-zentroetan, edo oinarrizko produktuak pertsona ahulenen etxeetara eramatera joanda, edo gure adinekoei telefono-deiak eginez.
Pandemia honek eragindako pertsona guztiei elkartasuna adierazteko unea da, zoritxarrez hildakoak uzten ari delako planeta osoan zehar, non gure nazioa eta gure hiria ez diren salbuespena. Baina biharko eguna eraikitzeko ere bada gaurkoa, jardun politiko bakoitza garrantzitsua da oso. Erakutsi beharko dugu osasungintza publikoaren alde egiten dugula eta gure erakundeek etorkizuneko edozein arazori erantzuna emateko behar diren bitartekoak izan ditzaten apustua egiten dugula. Krisi honen ondorioak arintzea, lanpostuak eta hauen kalitatea defendatuz, gure enpresen egoera, gure auzoetako saltokiak eta langile autonomoen etorkizun zalantzagarria, zeintzuei krisi honek modu basatian eraso baitie.
Elkarlanerako garaia da, eta, horregatik, indar politikoek, gure herrian eta gure subiranotasunaren berreskurapenean sinesten dugunok, pertsonen ongizatearen defentsan, gure etorkizuna demokratikoki erabakitzeko eskubidean sinesten dugunok, elkarri bizkarra emateko eta elkarrekin lan egiteko gai izan gaitezen dinamika nazional batean, gure nazioa berreraikitzeko, elkartasunaren, demokraziaren, berdintasunaren, askatasunaren eta justizia sozialaren balioetatik abiatuta.
Lanean eta akordioan oinarrituta, dauden dinamikak gaindituko dituzten eta antolaketa-autonomiarekiko errespetu sakonetik eta aniztasunaren onarpenetik abiatuta apustu egingo duten ekintza politiko eta sozialeko espazioen eraketa bultzatzea; izan ere, sentsibilitate guztiek gai izan behar dugu Euskal Errepublika ekartzeko, batzeko eta eraikitzeko, Europa askoz bidezkoago eta solidarioago baten barruan.
Gaur Aberri Eguna, gure Ikurriña gure leiho eta balkoietara aterako dugu, egunerokoan jarraitu beharreko keinu polit bat, etorkizuna eraikitzen has gaitezen, elkartzen gaituen horretan indarrak batuz, elkar errespetatuz, eta izan nahi dugun gizartearen balio demokratikoak egia bihurtuz, gizarte solidario hori, berdintasunean eta askatasunean lan egingo duena, justizia soziala defendatuz.
Guztion artean eraikiko dugu biharko Euskal Errepublika.
Jabier Estebanez «Gorri»
Donostiako Eusko Alkartasunako koordinadorea